"Que a Refundación permita a Esquerda Unida formar parte da esquerda que aposte pola construción da III República e do Socialismo do século XXI"
Executiva Nacional de Esquerda Unida
Prezados compañeiros e compañeiras:
A Executiva Nacional de Esquerda Unida quere desexarvos un feliz aninovo e que disfrutedes destas datas de maneira solidaria e responsable, como non podía ser doutro xeito nas persoas militantes e simpatizantes dunha organización que pula pola transformación da sociedade dende unha óptica de esquerdas alternativa e transformadora.
O 2010 semella ser un ano crucial na reconstrución do movemento de esquerda, xa que logo, a nosa organización apostou decididamente pola Refundación da esquerda na pasada IX Asemblea. Agora, despois dun ano de preparacións lanzamos o proceso de converxencia na que abrimos a nosa organización, a toda a cidadanía que comparte con nós a necesidade de transformar a sociedade na certeza de que outro mundo é posible.
O proceso de Refundación pode e debe marcar un fito histórico a nivel mundial, non en vano toda a esquerda europea está a ollar cara ao noso proceso para utilizalo de guía nos seus respectivos países, sabedores de que a apertura á sociedade é o único camiño para a súa transformación. Así pois, do éxito deste proceso dependen as esperanzas de millóns de cidadás e cidadáns de atopar un freo a maquinaria de pensamento único neoliberal.
A Refundación non é un proceso propio de Esquerda Unida, senón que debe incluír a toda a esquerda política e social alternativa e transformadora en torno a unha proposta política anticapitalista. Tampouco se trata de establecer relacións burocráticas entre Esquerda Unida e outras organizacións que por definición son autónomas e apartidarias, senón que o que se pretende e atraer aos activistas destas organizacións para que participen no dito proceso.
Pero para que a devandita Refundación transcorra polo camiño correcto necesitamos, máis que nunca, do traballo militante, xa que non cabe dúbida de que Esquerda Unida dispón da capacidade organizativa necesaria para levar a bo porto tan importante misión. Correspóndelles aos homes e mulleres de Esquerda Unida lanzar e liderar os distintos procesos que posibiliten a tan necesaria converxencia da esquerda transformadora.
Un esforzo militante que no noso país necesitará de folgos extras si queremos que a Refundación teña éxito, pois na Galiza contamos con dous problemas engadidos: por unha banda, loitar contra o desencanto que supuxo a decepción do fracasado goberno bipartito na xente de esquerdas (o mellor exemplo de que outra maneira de facer política é necesaria) e por outra banda, dispor dunha organización pequena, que si ben cada vez recibe máis apoios aínda ten moito que medrar como o demostra o feito de estar fora do arco parlamentar o que fai que sexamos transparentes para a maior parte dos medios de comunicación e que impide que a nosa mensaxe chegue con claridade a cidadanía.
O proceso de converxencia política e social é, sen dubida algunha, a clave da Refundación. As xentes de esquerdas debemos ser quen de construír un espazo de encontro aberto, plural, democrático, participativo e non excluínte ideoloxicamente. Un espazo de encontro que aglutine as xentes que forman as forzas políticas de esquerdas, as organizacións sindicais, ecoloxistas, sociais, altermundistas e culturais. En definitiva, trátase de aglutinar a todos os movementos que na sociedade civil se opoñen ao neoliberalismo e ao domino do mundo do capital.
Así, a Refundación da esquerda pretende ofrecer as condicións para que todo o que desexe participar no proceso de converxencia política e social poida facelo mediante a creación dun marco político que permita establecer un diálogo constante. É polo que dende Esquerda Unida ofrecemos, dende a humildade e o compromiso, a nosa estrutura organizativa para lanzar o dito proceso mediante a creación de diversas ferramentas participativas como foros, obradoiros, seminarios, charlas coloquio, manifestos, propostas ou encontros.
A finalidade da Refundación non é outra que construír programas de acción política que poidan ser postos na práctica de forma inmediata e que aglutinen a totalidade da cidadanía que aposta por cambios profundos que transcendan o esgotado sistema capitalista. Porque outro mundo non só é posible senón que é necesario. Así pois aspiramos a xerar unha nova organización política capaz de defender, difundir, dinamizar e poñer en práctica os programas políticos desenvolvidos democrática e participativamente por todas e todos, xa que logo, apostamos por unha nova forma de facer política onde os fluxos de información corren de abaixo a arriba, xusto todo o contrario que acontece coas forzas políticas convencionais que ao traballar dende arriba atópanse directamente presionadas polo poder do capital.
En definitiva, queremos que a Refundación permita a Esquerda Unida formar parte da esquerda que aposte pola construción da III República e traballe a prol da definición e implantación do Socialismo do século XXI. É dicir unha esquerda que non comulgue cas receitas neoliberais nin vexa na socialdemocracia unha alternativa global ao sistema capitalista.
César Santiso
Secretaría de Organización
Executiva Nacional de Esquerda Unida
A "Executiva Nacional de Esquerda Unida" ... ¿a qué nación se refire? Penso que no sexa a "España", porque si non e a España e vais seguir pola senda do nacionalismo, ides refundar o carallo...
ResponderEliminar